لاہور (سپیشل رپورٹر) سیکرٹری پرائس کنٹرول اینڈ کموڈٹیز مینجمنٹ ڈیپارٹمنٹ پنجاب ڈاکٹر احسان بھٹہ نے کہا ہے کہ وزیر اعلیٰ پنجاب مریم نواز کی ہدایت پر سبزی و فروٹ منڈیوں میں ڈیجیٹل سسٹم کا نفاذ کرنے فیصلہ کیا ہے۔ انہوں نے ماہ نومبر تک کاہنہ کاچھا مارکیٹ کو ماڈل بنانے کا انتباہ بھی کیا۔
ان خیالات کا اظہار انہوں نے سیکرٹری پرائس کنٹرول ڈاکٹر احسان بھٹہ نے پنجاب ایگریکلچرل مارکیٹنگ ریگولیٹری اتھارٹی کے اہم اجلاس سے خطاب کرتے ہوئے کیا۔ اجلاس میں ایڈیشنل سیکرٹری ایڈمن، ڈی جی پامرا طارق بسرا، ڈائریکٹر سی اینڈ ایم تنویر شامی , ڈائریکٹر ایگریکلچرل مارکیٹنگ انفارمیشن سسٹم اجمل اور دیگر افسران شریک تھے۔
ڈاکٹر احسان بھٹہ نے سبزی منڈیوں کی صفائی ستھرائی کے انتظامات ایل ڈبلیو ایم سی کے سپرد کرنے کا احکامات جاری کئے۔ انہوں نے کہا کہ صوبہ بھر کی منڈیوں میں مارکیٹ فیس وصولی کو آؤٹ سورس کرنے سے ریونیو میں نمایاں اضافہ ہو گا۔ اس سلسلے میں باقاعدہ پلان مرتب کیا جائے تاکہ اس پر جلد عملدرآمد کیا جا سکے۔ محکمے کے ریونیو اہداف میں اضافے کیلئے آؤٹ سورسنگ ماڈل کا دائرہ کار وسیع کیا جائے۔
انہوں نے ہدایت جاری کی کہ منڈیوں میں بولی کے اوقات میں سیکرٹری مارکیٹ کمیٹی کی بذریعہ جیو ٹیگنگ معہ تصاویر حاضری لازم ہوگی۔ سیکرٹری پرائس کنٹرول اینڈ کموڈیٹیز مینجمنٹ ڈیپارٹمنٹ پنجاب نے مارکیٹ کمیٹیوں کے سالانہ اہداف پورے نہ ہونے پر سخت کارروائی کا عندیہ دیا۔
ڈاکٹر احسان بھٹہ نے کہا کہ منڈیوں میں صفائی، نکاسی آب، صاف پانی اور بجلی کی فراہمی ترجیحی بنیادوں پر کی جائے۔افسران اور عملے کی استعداد کار میں اضافے کیلئے پیام کو ٹریننگ ماڈیولز فوری تیار کرنے کی ہدایت کی۔ محکمے کے زیر انتظام تمام اتھارٹیز ڈیجیٹل ڈیٹا بیس اور کوآرڈی نیشن یقینی بنائیں گے۔
اس موقع پر ڈی جی پامرا طارق بسرا نے محکمانہ امور اور جاری پراجیکٹس بارے تفصیلی بریفنگ بھی دی۔
