40 تحصیلوں میں سہولت بازاروں کیلئے جگہ کا انتخاب مکمل ہو چکا، باقی پر مشاورت ہو رہی ہے:سیکرٹری پرائس کنٹرول کموڈٹیز مینجمنٹ ڈیپارٹمنٹ پنجاب
لاہور (سپیشل رپورٹر) سیکرٹری پرائس کنٹرول اینڈ کموڈٹیز مینجمنٹ ڈیپارٹمنٹ پنجاب ڈاکٹر احسان بھٹہ نے کہا ہے کہ وزیر اعلیٰ پنجاب مریم نواز کی ہدایت پر 100 تحصیلوں میں سہولت بازاروں کے قیام کیلئے اقدامات جاری ہیں۔ 40 تحصیلوں میں سہولت بازاروں کیلئے جگہ کا انتخاب مکمل ہو چکا ہے جبکہ بقیہ تحصیلوں پر مشاورتی عمل جاری ہے۔
سیکرٹری پرائس کنٹرول ڈاکٹر احسان بھٹہ نے سہولت بازاروں کا دائرہ کار بڑھانے سے متعلق اجلاس سے خطاب کرتے ہوئے کیا۔ اجلاس میں ایکٹنگ ڈی جی پنجاب سہولت بازار اتھارٹی نوید احمد، ڈائریکٹر پروجیکٹس روشن ضمیر اور دیگر افسران نے شرکت کی۔
ڈاکٹر احسان بھٹہ نے اجلاس میں بتایا کہ لاہور ڈویژن میں 7، فیصل آباد 12، راولپنڈی 23،سرگودھا 11 جبکہ ساہیوال میں 4 مقامات پر بازار قائم کیے جائیں گے۔ گجرات ڈویژن 8، گوجرانولہ 7، بہاولپور 13، ڈی جی خان 11جبکہ ملتان میں 9 سہولت بازار قائم کیے جائیں گے۔
ایکٹنگ ڈی جی پنجاب سہولت بازار اتھارٹی نوید احمد نے اپنی بریفنگ کے دوران ڈاکٹر احسان بھٹہ کو 100 تحصیلوں میں انتظامات بارے آگاہ کیا۔
سیکرٹری پرائس کنٹرول اینڈ کموڈٹیز نے 13 زیر تعمیر سہولت بازاروں کو بروقت مکمل کرنے کی ہدایت کی۔ 30 تحصیلوں میں متبادل جگہوں کے لیے ورکنگ جاری رکھنے کیلئے کہا۔ انہوں نے کہا کہ متعلقہ اضلاع میں افسران سہولت بازاروں کیلئے جگہ کے حصول کیلئے ضلعی افسران سے کوآرڈی نیشن میں تیزی لائیں۔
ڈاکٹر احسان بھٹہ نے کہا کہ شہر سے باہر غیر موزوں مقامات پر بازار منتقل نہ کیے جائیں تاکہ صارفین کو آنے جانے میں دشواری پیش نہ ائے۔ انہوں نے کہا کہ وزیر اعلیٰ پنجاب مریم نواز کی ہدایت پر عوامی ریلیف کو مدنظر رکھتے ہوئے اقدامات یقینی بنائے جائیں۔
